Várjjat Sámi Musea
Várjjat Sámi Musea lea mearrasámi musea ásahuvvon Vuonnabahtii Unjárgga gielddii. Musea áimmahuššá Finnmárkku mearrasámiid kulturhistorjjá Várjjatvuonas, sámi ovdahistorjjá, arkelogiija ja sámi dálááiggi.
Musea váldoviessu huksejuvvui 1994:is ja dan erenoamáš arkitektuvrra vuolggasadji lea sámi árbevirolaš huksenvierut ja birastahtti eanadagat.
Váldovisttis gávnnat váldočájáhusa “Mearrasápmelaččat” gos beasat vásihit guovllu ovdáneami maŋimuš 10 000 jagi. Dáppe mis lea earret eará “Stuorravuonn’olmmái” čájáhusas. Dat lea unna figuraš mii lea badjel 4000 jagi boaris, ráhkaduvvon bohccočoarvvis. Dat gávdnui Stuorravuonas ja lea ožžon namas “Stuorravuon’almmái” ja dat lea vuođđun Várjjat Sámi Musea logoi.
Sámi geavahusdáidda ja duodji lea maiddái dehálaš vuoruhansuorgi Várjjat Sámi museai ja mis lea iežamet duodječájáhus mii gárvána geasseáigodahkii. Mii doallat maiddái gaskabottosaš čájáhusaid dáiddáriin ja eará heivvolaš dáidagis ja duojis. Sisa lea maiddái ráhkaduvvon mánáid duhkoraddanlatnja man inspirašuvdna lea Stállobiedju.
2002:is gárvánii olgošillju gos gávdnojit earret eará sávzzaidbuvrrit, bealljegoahti, áiti, dollastallansadji ja loddegeahčadansadji. Čakčagease lágiduvvojit Vuonnamárkanat olgošilljus.
Várjjat Sámi Musea hálddaša maiddái Ceavccegeađggi kulturmuitoguovllu – okta daid riggáseamos ja erenoamáš kulturmuitoguovlluin Skándinávias.
Dasa lassin lágidat mii ja heivehat iešguđetgelágan doaluid várrás miehtá jagi.
Fálaldagat:
- Fásta ja gaskabottosaš čájáhusat
- Museagávpi
- Museakafea gos sáhtat oastit káfe ja vaffeliid geasseáigodagas
- Turistadiehtojuohkin
- Duhkoraddanlatnja siste ja duhkoraddan šillju olgun
- Gaskkusteapmi ja heivehuvvon logaldallamat
