Musea birra
Várjjat Sámi Musea lea Vuonnabađas, Unjárgga gielddas. Musea áimmahuššá Finnmárkku mearrasámekulturhistorjjá, Várjjatguovllus. Erenoamážit deattuha musea duođaštit ja čájehit dujiid olles Sámis.
Musea ođđa váldovisttis, mii huksejuvvui 1994, lea gelddolaš árkitektuvra, árbevirolaš sámiid huksenvuohki lea geavahuvvon.
Váldovisttis gávnnat váldočájáhusa “Mearrasámit”, duodječájáhusa ja dasalassiin gaskabottosaš iešguđetlágán čájáhusat.
Geasset 2002 lei gárvvis olgošillju gos leat e.e. sávzzaidbuvri, bealljegoahti, áiti, dollastaddansadji, loddegeahčadansajit, luovvi ja mánáid stoahkanšilju.
Várjjat Sámi Musea hálddaša maid Ceavccegeađggi kulturmuitoguovllu – okta daid riggáseamos ja erenoamáš kulturmuitoguovlluin Skándinávias. Gielda eaiggáda ja jođiha musea, ja oažžu maid doaibmadoarjja Sámedikkis.
